Saturday, November 17, 2007

NA I TOVO VAKAVANUA ME BALETA NA VEIWEKANI

A i Lakovi
Ni dua na lewe ni yavusa se mataqali e dau laki tu tani vakadede ka sa laki vakawati, vakaluveni ka qai nanumi me dau laki laurai tale mai. E dau kedra i rai na tabua ka vakavuqa ko ira ka ra laki tu e na nodra koro ni vasu se ni dro e dua na yalewa vakawati e nona koro.

Na Vasu
E dau na gone e vasu ena koro nei tinana e dau tu vei ira e dua na sau ka vakatau vei ira na nodra vakayagataka na kaukauwa oqori. E dau rawa vei ira mera VASUTA se me taura e dua na ka e nodra na weka i tinana se nona momo. E rawa ni vasuta nai yau ka cobota me nona kece na i yau ka dau kenai vakarau me dau cakava e dua na nona magiti ni vakavinavinaka se me i VAKATAKATA NI LIGA. Oqo e dua na magiti levu na vica vata na bulumakau, vuaka kei na vuqa tale.

Na i Bulubulu
Ni dua e cakava e dua na cala vakavanua, e na bulubulu se soro. E dau vakacabori e dua na yaqona se tabua me i bulubulu ka vakatau ena bibi ni cala e vakayacori. E rawa tale ga ni caka na bulubulu vei ira era dau veivala se veicati.

Na Cere
Oqo na nodra kidavaki e dua na mata i lakolako dokai vakavanua. E dau caka na cere me i vakaraitaki ni veidokai ka sega ni ka ni veiwali se qito. E tau veitautaki na cere ka dau cicivi ko ira ka muri tiko mai vanua ko ira na vulagi se qalovi ke ra cici tiko mai. E ra dau vakatagi davui na i taukei ka ra qai cici tiko yani e liu me ra kakua ni toboki mai vei ira na cici cere. Kevaka era na tobo e ra na lau moku. Ni ra sa yacova yani na i yau ni cere, e ra na qai laki dabe ka cobota ka dau nona na ulu ni cere (tabua) o koya e liu duadua.

Na i Qusi ni Loaloa
Ni dua na mataqali se yavusa e caka na nona soqo se ogaoga vakavanua, e ra dau lako tale mai e so na wekadratou me ra ma veivuke. Ni sa oti na soqo, e ratou na qai cakava e dua nai yau kei na kena yaqona kei na kena magiti ko irataou na i taukei ni soqo vei ira na wekadratou mei i vakavinavinaka kei na veidolei ni sa mai caka rawa na soqo. E dau cabo ga na i qusi ni loaloa.

Na i Vakatale
Ni sa dau caka oti na i qusi ni loaloa, e sa na caka tale e dua na kedra i vakatale. E na so na gauna e ratou na cakava o iratou na vakarau lako tiko e dua na nodratou i tatau ka rawa ni caka ga e dua na yaqona se tabua ka vakatau ena bibi ni soqo e caka

Bulu Yava
Ni ra sad au lesu tale na vulagi ka ra sa tiko mai na i taukei, e sa qai lose na yaqona me ra gunuva tiko me ra bulu we ni yava tiko. E sega ni dau cabo e dua na yaqona ka caka me ra nanumi kina ko ira na sa lesu tale.

E na qai vakuri tale yani...Fijituwawa.com Research Team

5 comments:

Fijituwawa News said...

Totoka na veiqaravi,maqona na ke na i tuvatuva.

sydneyfijians said...

thx...4 informinging us abt our unique culture..sa totoka ni da vaka wilika tiko....vinaka saka vakalevu

Fijituwawa News said...

Vinaka Sydney Fijians na veitaratara tiko mai....ena biu cake tale eso nai tukutuku ena mua ni macawa oqo.

Loloma
FIJITUWAWA tEAM

batiwai said...

Ni sa bula vinaka mai nai tokani koni sa oga sara vakalevu ena kena maroroi ka wasei tiko na nodai yau na kawai taukei.Sa totoka saraga nida vakawilika toka nai tukutuku eso era sa tuqo.Ena rawa beka ni dua na gaunisala meu na qirimada yani kina baleta ga na kena gadrevi sara tiko yani vakalevu nai tukutuku era tu ena website qo.
sa kena levu saka

kalivati said...

isa sa totoka sara na veika e cauraki tiko mai.au vulica sara tiko kina na veika kau kila niu sebera ni kila ia, ka sa bau dua dina na vuli levu vei au niu vakamuria sara tiko mai vakamatailailai na veika me baleta na noda bula se na itovo dina ni itaukei, ka sa vaka me sa qai luluqa se sauvu tiko yani vakamalua.E dua wale tiko ga na noqu vakatataro koi au me baleta wale tiko ga e vica na ulutaga lalai kau sagasaga tiko meu kila na kena i balebale,na imoimoi ka salavata na kena vosa ena gauna ni vakacacabo. Sa tuva tiko ga ni qori e tolu na na ulutaga: iduguci.
itataunaki.
matanigasau.